پیغامِ سالِ نو: وقت کی پکار اور خود احتسابی
وقت کی تیز گامی اور حیاتِ مستعار
سن 2025ء کی شام ڈھل رہی ہے اور 2026ء کا سورج طلوع ہونے کو ہے۔ ماہ و سال کی یہ گردش ہمیں یاد دلاتی ہے کہ وقت کسی کے لیے نہیں ٹھہرتا۔ زندگی اس برف کی مانند ہے جو ہر لمحہ پگھل رہی ہے۔ ہم جسے "نئے سال کی آمد" کہتے ہیں، وہ حقیقت میں ہماری عمرِ عزیز کے ایک اور سال کا اختتام اور موت سے ہماری قربت کا ایک اور سنگِ میل ہے۔
عہدِ الست اور مقصدِ تخلیق
انسان اس دنیا میں محض وقت گزاری کے لیے نہیں آیا، بلکہ اس کے کندھوں پر "خلافتِ ارضی" کی عظیم ذمہ داری ہے۔ عالمِ ارواح میں ہم نے اپنے رب سے وفاداری کا جو وعدہ (عہدِ الست) کیا تھا، گزرتا ہوا ہر لمحہ اسی کی یاد دہانی ہے۔ قدرت ہمیں مہلت دے رہی ہے کہ ہم اپنی سمت درست کر لیں۔ قرآنِ کریم نے واشگاف انداز میں خبردار کیا:
يَا أَيُّهَا الْإِنسَانُ إِنَّكَ كَادِحٌ إِلَىٰ رَبِّكَ كَدْحًا فَمُلَاقِيهِ (اے انسان! تو کشاں کشاں اپنے رب کی طرف چلا جا رہا ہے اور بالآخر تجھے اس سے ملنا ہے)۔
اپنا محاسبہ کیجیے (Self Introspection)
سالِ نو کی اصل روح جشن منانا نہیں، بلکہ خلوت میں بیٹھ کر محاسبہ کرنا ہے۔ حضرت عمر فاروق رضی اللہ عنہ کا یہ زریں اصول ہماری رہنمائی کے لیے کافی ہے
اپنا حساب کرو اس سے پہلے کہ تمہارا حساب لیا جائے، اور اپنے اعمال کو تول لو اس سے پہلے کہ وہ تولے جائیں۔
: آئیے اس موڑ پر رک کر سوچیں
کیا میری عبادات اور معاملات اللہ کی رضا کے مطابق ہیں؟
کیا میرے اخلاق اور معاشرتی رویے ایک مومن کی شان کے عکاس ہیں؟
کیا میرے دن اور راتیں گناہوں کی نذر ہو رہی ہیں یا اطاعتِ الٰہی میں؟
: علامہ اقبال نے کیا خوب فرمایا تھا
صورتِ شمشیر ہے دستِ قضا میں وہ قوم
کرتی ہے جو ہر زماں اپنے عمل کا حساب
فرصت کو غنیمت جانیے
نبی کریم ﷺ نے ہمیں پانچ چیزوں کو پانچ سے پہلے غنیمت جاننے کی تاکید فرمائی ہے: جوانی کو بڑھاپے سے پہلے، صحت کو بیماری سے پہلے، مالداری کو مفلسی سے پہلے، فرصت کو مصروفیت سے پہلے اور زندگی کو موت سے پہلے۔ یہ حدیث ہمیں مستقبل کی منصوبہ بندی اور وقت کی قدردانی کا درس دیتی ہے۔
حرفِ آخر: ایک نیا عزم
جو بیت گیا وہ ماضی کا حصہ بن گیا، مگر جو باقی ہے وہ ابھی آپ کے ہاتھ میں ہے۔ سالِ نو کا اصل پیغام یہ ہے کہ اگر اب تک غفلت میں زندگی گزری ہے، تو آج ہی ندامت کے آنسوؤں سے پچھلے داغ دھو ڈالیں اور ایک نئے عزم کے ساتھ زندگی کی بقیہ گھڑیوں کو "عہدِ الست" کی پاسداری میں وقف کر دیں۔
یاد رکھیے! تلافی کا موقع اب بھی موجود ہے، بس بیدار ہونے کی ضرورت ہے۔
اپنی رہنمائی اور دعا سے ضرور نوازیں ۔۔۔۔۔
مزید پڑھیں ۔۔۔
https://urduarabiccorner.blogspot.com/2025/09/blog-post.html
https://urduarabiccorner.blogspot.com/2025/07/blog-post_10.html
