بسم اللہ الرحمن الرحیم
فلسفۂ قربانی
بقلم : عتیق اللہ کلیم
تمہید :
دینِ اسلام ایک مکمل ضابطۂ حیات ہے جس کا کوئی بھی حکم حکمت و مصلحت سے خالی نہیں۔ بظاہر جو عبادات ہمیں محض روحانی یا روایتی محسوس ہوتی ہیں، اگر ان کا عمیق مطالعہ کیا جائے تو ان کے پسِ پردہ بے پناہ سائنسی، معاشی اور ماحولیاتی فوائد نظر آتے ہیں۔ انہی شعائرِ اسلام میں سے ایک اہم ترین فریضہ "قربانی" ہے، جو سنتِ ابراہیمی کی یادگار ہونے کے ساتھ ساتھ خالقِ کائنات کی رضا کے حصول کا ایک عظیم ذریعہ ہے۔
عمومی طور پر قربانی کو محض جانور کا خون بہانے اور گوشت کی تقسیم تک محدود سمجھا جاتا ہے، لیکن موجودہ دور میں جب دنیا کو ماحولیاتی بگاڑ، گلوبل وارمنگ، آبی بحران اور معاشی عدم استحکام جیسے سنگین چیلنجز کا سامنا ہے، تو اسلام کے اس نظامِ قربانی کی اہمیت اور افادیت مزید نکھر کر سامنے آتی ہے۔ یہ ایک ایسا متوازن خدائی نظام ہے جو نہ صرف معاشرے کے غریب اور پسماندہ طبقات کی معاشی کفالت کرتا ہے، بلکہ زمین کے حیاتیاتی اور ماحولیاتی توازن کو برقرار رکھنے میں بھی ریڑھ کی ہڈی کی حیثیت رکھتا ہے۔
زیرِ نظر مقالے میں ہم قربانی کے اسی کثیر الجہتی فلسفے کا علمی و تحقیقی جائزہ لیں گے اور تاریخی و سائنسی حقائق کی روشنی میں یہ جاننے کی کوشش کریں گے کہ اگر اس ربانی نظام میں انسانی مداخلت کی جائے، تو اس کے کرۂ ارض اور عالمی معیشت پر کس قدر تباہ کن اثرات مرتب ہو سکتے ہیں۔
لفظِ قربانی عربی زبان سے ماخوذ اسم 'قربان' کے ساتھ "ی" بطور لاحقہ نسبت ملانے سے مرکب بنا ہے اور اردو زبان میں بطور اسم مستعمل ہے۔
قربانی کے اصطلاحی معنی: وہ جاندار جسے خدا یا دیوتا کی خوشنودی حاصل کرنے کے لیے ذبح کیا جائے، یہی وجہ ہے کہ قربانی کا تصور تمام مذاہب میں پایا جاتا ہے اور دینِ اسلام نے بھی حدود و قیود کے ساتھ اس کو باقی رکھا ہے۔
لہٰذا دلیلِ ظنی ”فَصَلِّ لِرَبِّكَ وَانْحَرْ“ اور حدیث "مَنْ وَجَدَ سَعَةً فَلَمْ يُضَحِّ، فَلَا يَقْرَبَنَّ مُصَلَّانَا" کے تحت ہر صاحبِ نصاب مسلمان پر ایامِ قربانی میں قربانی کرنا ضروری ہے۔
اگر ہم اس عبادت کے اندر غور کریں تو ہمیں تین اہم نکات معلوم ہوتے ہیں:
1۔ یہ ایک مذہبی عمل ہے جس پر رضائے الٰہی کا انحصار ہے۔
2۔یہ ایک مربوط معاشی و اقتصادی نظام ہے جس سے مسلم اور غیر مسلم سب جڑے ہوئے ہیں۔ مثال کے طور پر کسانوں کا چارہ اور جانور فروخت کر کے منافع کمانا، اور دیگر اجزاء (جیسے چمڑا، ہڈیاں وغیرہ) کے ذریعے دسیوں صنعتوں کا رواں دواں رہنا۔
3۔قربانی کے ذریعے سے ماحولیاتی نظام کے توازن کا برقرار رہنا۔
اس مقالے میں ہم ماحولیاتی نظام پر قربانی کے کردار اور اثرات کو پیش کریں گے۔
خالقِ کائنات نے دنیا کا نظام اس طرح بنایا ہے کہ اس میں ہر چیز، جس کے کرنے یا نہ کرنے کا خدا حکم دیتا ہے، اس کا انحصار اس کائنات کے نظام پر ہوتا ہے۔ اگر خدائی نظام کے ساتھ چھیڑ چھاڑ کی جائے تو اس کا خمیازہ بھگتنا پڑتا ہے۔
مثلاً 1902 میں ویتنام کے دارالحکومت ہنوئی میں، جب وہ فرانسیسی حکومت کے تابع تھا، انتظامیہ نے چوہوں کو ختم کرنے کا ارادہ کیا اور چوہے مارنے پر انعام بھی رکھا۔ اس کی وجہ سے تمام چوہے ختم ہو گئے اور پھر وہاں خطرناک قسم کا طاعون پھیل گیا۔
اسی طرح 1958 میں چینی حکومت نے چڑیوں کو فصل کھانے والا کیڑا قرار دے کر تمام چڑیوں کو مارنے کا حکم دے دیا۔ جب تمام چڑیاں ختم ہو گئیں تو ٹڈی دل نے تمام فصلوں کو کھا کر تباہ کر دیا اور 1959 سے 1961 تک چین میں عظیم قحط پڑا جس میں کروڑوں لوگ مرے۔ بالآخر چینی حکومت کو روس اور کینیڈا سے چڑیاں خرید کر اپنے ملک میں چھوڑنی پڑیں۔ یہ تمام مثالیں قدرت کے نظام میں خلل اندازی کے بھیانک نتائج کی ہیں۔
ان تاریخی حقائق کی روشنی میں اگر ہم قربانی کے عمل پر پابندی کے ماحولیاتی اثرات کا جائزہ لیں تو درج ذیل سنگین نتائج سامنے آتے ہیں۔ ہم گائے، بیل، بھینس وغیرہ کو دیکھیں کہ قدرت نے ان کے ذبح کرنے کا حکم دیا ہے، لیکن اگر ان کو ذبح نہ کیا جائے یا نہ کرنے دیا جائے تو کیا ہوگا:
1۔ میتھین گیس اور گلوبل وارمنگ میں اضافہ:
گائے، بیل اور بھینس جگالی کرنے والے جانور ہیں اور ہر گائے سال میں 100 کلو میتھین خارج کرتی ہے۔ یاد رہے کہ میتھین کاربن ڈائی آکسائیڈ (CO2) سے 28 گنا زیادہ طاقتور گیس ہے۔ اس حساب سے دنیا میں ابھی 1.5 ارب گائے، بیل وغیرہ ہیں۔ اگر ذبح نہ کرنے پر ان کی آبادی دو گنا ہو جائے تو صرف میتھین سے گلوبل وارمنگ میں 10.8 فیصد اضافہ ہوگا اور یہ پوری ایوی ایشن انڈسٹری (Aviation Industry) سے زیادہ ہے۔
2۔ زمین اور جنگلات کی تباہی:
ایک گائے کو سال میں دو ایکڑ زمین کا چارہ چاہیے۔ اگر آبادی دوگنی ہو گئی تو چارے کے لیے مزید جنگلات کاٹنے پڑیں گے۔
3۔ پانی کا بحران:
ایک کلو بیف بنانے میں 15,000 لیٹر پانی لگتا ہے، لیکن اگر یہ جانور زندہ رہیں تب بھی انہیں روزانہ 100 لیٹر پانی پینے اور ان کا چارہ اگانے کے لیے درکار ہوگا۔ انہیں ذبح نہ کرنے سے ان کی آبادی بڑھے گی اور پانی کی قلت والے علاقوں میں شدید بحران پیدا ہوگا۔
4۔ حیاتیاتی تنوع کو نقصان:
اس آبادی کے بڑھنے سے گھاس کے میدان ختم ہو جائیں گے، جنگلی جانوروں کا مسکن تباہ ہو جائے گا اور ہرن، خرگوش اور پرندوں کی زندگی بری طرح متاثر ہوگی۔
خلاصہ:
ہندوستان کی کئی ریاستوں میں گؤ کشی پر پابندی کی وجہ سے یہ جانور سڑکوں پر آوارہ پھر رہے ہیں۔ یہ فصلیں تباہ کرتے ہیں، ان کی وجہ سے ٹریفک حادثات میں اضافہ ہوتا ہے، اور یہ خود کچرا کھا کر تکلیف دہ موت مر رہے ہیں۔ لہٰذا خدائی احکامات میں مداخلت اور رد و بدل سے بچنا چاہیے اور اس اہم دینی فریضے، قربانی کو اللہ کی رضا کے لیے کرنا اور کرنے دینا چاہیے۔ ہمیں خود کو اور انسانیت کو اس عظیم خسارے سے بچانے کی کوشش کرنی چاہیے۔
حوالہ جات:
- اقوام متحدہ کی رپورٹ FAO 2013
- 2021 IPCC
- 2006 FAO
- Water Footprint Network
- Indian Council of Agricultural Research (ICAR)
